Galma Geessa

Galma Geessa

Kufaatidhaan eegala
Jalqabni milkaa’inaa
“Gufadheera” jettanii
Bakka sana hin taa’inaa

Hurufa heddummatti
Jireenyi biyya lafaa
Jabaan kufus ni ka’a
Dadhabaan achitti hafa

Kaayyoo kamuu qabaadhu
Nama hojjetu yoo taate
Aarsaa malee hin geessu
Galma qabattee kaate

Kanaaf seenaan hayyootaa
Waan baay’ee nu barsiisa
Kufanii ka’uu beekuuf~Albert Enistaayintu
Daandii nutti agarsiisa

Abdii kutachuu dhiisee
Al torba kufee ka’ee
Xurree qaroominaarra
Kutannoo cimaan ga’e

Fakkeenya ati fudhattee
Ittiin galaana ceetu
Thomas Edson ilaali
Obsaaf kutannoo feetu

Ji’a sadii barate
Mana barumsaa galee
Waan gadadoos rakkinni
Lakkuu isarratti dhale

Gidiraa biyya lafaa
Obsee garaatti baatee
Balbii har’a ibsannu
Tiriikaa addunyaaf laate

Galma isaa hin hanqifne
Rakkinni isa hudhanii
Irra deddeebiin yaalee
Yeroo kuma kudhanii

Obsaan yaadee kalaqee
Dukkana ibsuuf maloota
Gumaacha guddaa kana
Kaa’ee darbe dhalootaa

Abdii akkan kutanne
Gaafa kutatte abdii
Rakkoon si kuffisuutti
Ofumaaf kuftee cabdi

Miti gaafa maramtee
Carqiin awwaala buutu
Gaafa hamileen kee du’e
Dhugaan kan ati duutu

Kanaafuu…

Karri tokko cufamu
Lamatu siif banama
Hireen abaarin ciiftee
Galgalaa fi ganama

Jiruu biyya lafaatu
Qorumsadha obbolee
Hedduunis obsa dhabee
Abdii kutuun okkole

Bakka kuftee ka’i
Laali bitaaf mirga
Daandiin biraa jira
Siif baadhatee silga

Ati abdii akka hin kunne
Dursii abdii kutadhu
Bakka har’a jirturraa
Fuulduratti butadhu!

Kuftee achitti hin hafin
Ol ka’i ni dandeessaa
Hin dhaabbatin tiradhu
Gaaf-tokko galma geessa